منو هذا؟
هذا واحد ياباني ... إسمه إيجي ... و إسمه الكامل
إيجي تويودا
فتح مصنع صغير للسيارات قبل الحرب العالميه الثانيه ... و سماه (تويودا) ... بعدين غيره و سماه (تويوتا)
مصنعه كان على قده ... قعد 13 سنه ما سوى إلا 2500 سياره .. و ما كان عنده قطع مصنعه باليابان ... فكان ياخذ قطع سيارات أمريكيه (سيارت جنرال موتورز) .. و يسوي منهم سيارات تويوتا
عقب ما خلصت الحرب ... راح أمريكا شاف مصانع فورد .. و الأمريكان يقولون إنه إشتغل كمهندس في مصانع فورد ... ولما رجع اليابان قام يراسلهم عشان يساعدونه و يشاركونه ... كشتوا فيه فتره ... بعدين وافقوا يصدرون له قطع و ياخذون 40% من الربح .. وبعدين رفعوها 50% من الربح ... و هو كان صابر عليهم و يقول حق اللي حواليه انهم ما يعاملونه كشريك
المهم ... الأخ صنع سيارة كورولا بالستينيات ... و ضربت معاه في أوائل السبعينيات .. و بالسبعينيات غزا السوق الأمريكي .. و قبل 6 سنوات ... طلبت فورد من تويوتا أنهم يتشاركون معاهم بتصنيع السيارات الصغيره
رجل مكافح .. وصنع شيء من لاشيء .. و الأهم من كل هذا إنه كون إسم ياباني قوي جدا في عالم السيارات
نرد حق الوضع عندنا ... على كثر الفلوس اللي عند تجار الكويت .. شنو عملوا؟؟ ... شنو الصناعه المحترمه اللي قدموها ... شنو الماركه الكويتيه أو المنتج الكويتي المحترم اللي تعبوا علشانه؟!؟
ترى الكثير جدا من كبار مليارديرات العالم يبحثون عن الأسم و الجوده ... ويبتكرون أفكار جديده في عالم الصناعه و التجاره ... مثل بيل غيتس ... مثل وارين بوفيت الداعم الكبير لكبريات شركات الصناعه و التأمين .. مثل صاحب محلات وولمارت ... و القائمه طويله
احنا بالكويت ما عندنا أحد يشتغل من أجل صناعة منتج كويتي محترم يرفع الراس ... لأنهم مو ضامنين الربح ... تخيلوا واحد عمره سبعين سنه و فلوسه تارسه البنوك و يخاف يسويله مصنع و الا خط انتاج بالكويت عشان خايف يخسر
بالكويت عندنا فوق ال 100 ألف عماله سايبه بالشوارع أو مالها شغل ... لو كنا محترمين كنا حطيناهم بمصنع و طلعنا أي شي ... لكن منو تكلم ... هم عندهم مواضيع أهم ... مثل حجاب نوريه الصبيح وكتاب شيكاغو
لوول حلوه القفله دكتور .. بعذرهم بهالكتاب لكن إذا نبي الشيء نوصله لو بجزر القمر بثانيه .. والله يعافي الانترنت عيال الحلال اكثار
كلامك صحيح أحنا مانبي يحطون للكويت اسم أهما خل يستثمرون لنفسهم بالكويت .. 80% من السوق بالإمارات والإستثمارات من تجار كويتيين .. تجارنا للأسف ماعندهم ثقه نهائيا بديرتنا
أبسط مثال شوف مجمعاتنا شوف سبل الترفيه عندنا تعتبر ولا شيء مقارنه بشغف الشعب بهالجانب
جزر عندنا لو عند غيرنا جان صارت جنه وسبل استثمار مو طبيعي لكن شنقول الوليد بن طلال قال بيأخذ كبر قالوا لا حماية البيئه !! اقول من زين بيئتنا وهيه شهبه لهبه .. عدلوا الخضراء بالشوارع .. وأخر شيء يمنع زراعة حدائق بسياج خارج المنازل .. مادري شايفين عمرهم أهما مخضرين الشوارع واحنا ماندري .. الحين الدواوين عادي والحدائق ممنوع ؟؟!! عقليه غريبه عجيبه
سولنا الأفينوز صار احتكار كل المجمع بمحلاتهم و 8 ستاربكس !!! وتقولي تيوتا
الكويت دمارها مو بس بحكومتها حتى بتجارها فيهم طمع وجشع والمناقصات ترسي على شركتين وكل شغلهم بوق ابوق
يركبون أجهزه بوزارة الدولة عقب سنه يشيلونها من السوق يطلعون 100 علة .. مو خسرانين شيء أموال الدوله السايبه لهم وللحكومه الضايعه
غير قطاعات الدولة الي للحين بمباني مأجره من سنة 1000 وحطبه !! عايزانين تبنون بفلوسكم شيء للدولة نفسها بدل ما تأجرون عند ربعكم وليته شيء سنع
وعمار ياكويت .. وتسلم محتاجين نسمع يادكتور لا تبخل علينا بالقطاره واصل .. وسوري على الإطالة بس موضوعك له شجن